બાળપણનાં મિત્રો

બાળપણનાં મિત્રો

કવિ તારી કલમને આ શું થઈ જાય છે
જ્યારે પણ વાત મૈત્રીની આવે
પન્ના આપમેળે જ ભરાઈ જાય છે

મસ્તીભરી પળો યાદ જ્યારે આવી જાય છે
હોઠ તારા કેમ મંદ-મંદ મલકાઈ જાય છે
બાળપણના દિવસોનું સ્મરણ કરતા
કેમ તારી આંખો ખુશીથી છલકાઈ જાય છે

શાળાના એ દિવસોની યાદ જ્યારે આવી જાય છે
એ સમયનું સચોટ ચિત્ર ત્યારે ઊભું થઈ જાય છે
ખભે થેલો લટકાવી, મસ્તી કરતા કરતા
કેમ ફરી તને શાળામાં જ ભણવાનું મન થઇ જાય છે

સમયનું તો કામ જ છે એ તો વહ્યો જ જાય છે
ને માથે જવાબદારીનો ટોપલો એ નાખતો જાય છે
ત્યારે યાદ આવે છે બાળપણના એ દિવસો
ને કોણ જાણે કેમ હૈયું ભરાઈ જાય છે

કવિ તારી કલમને આ શું થઈ જાય છે
જ્યારે પણ વાત મૈત્રીની આવે
પન્ના આપમેળે જ ભરાઈ જાય છે



- ચિરાગ