પ્રેરણા

પ્રેરણા

આગળ વધવાની તમન્ના છે,ને સંઘર્ષભર્યો પથ છે
સફળતાની મંજિલ હાંસલ કરવા
આ પથ પર તૂ ચાલતો રહેજે

ચાલતા ચાલતા નિરાશાની ઠોકરો તો ઘણી વાગશે
પણ પ્રગતિ કેરી કેડી પર
તૂ તો આગળ વધતો રહેજે

થાકી જઇશ, હારી જઇશ,ક્યારેક તો ભટકી જઇશ
ભટકેલા એવા તને માર્ગ ચીંધવા
પ્રભુ ને અરજ કરતો રહેજે

વ્હારે જજે ગરીબોની, ભૂખ્યાનું તૂ ભોજન બનજે
તરસી એવી આ દુનિયા માટે
પ્રેમની સરિતા થઇ વહેતો રહેજે

હતાશાના કેટલાય ડુંગર, માર્ગમાં તારા ઉભા હશે
નાનકડા એવા કંકર સમજી
એ ડુંગર તૂ ખૂંધતો રહેજે

પવનના તો સેંકડો પ્રહાર તને ડરાવશે 'ચિરાગ'
પણ જગને પ્રકાશમય કરવા
તૂ સદાય જળતો રહેજે.

  -ચિરાગ