તમે મળ્યા

તમે મળ્યા

હતાશાના  વાદળોમાં હું જયારે શૂન્ય થયો
ત્યાં જિંદગીના ગણિતમાં હમસફર બની
એકડો ઘૂંટવા તમે મળ્યા

પ્રેમના અભાવે મનની ભૂમિ વર્ષોથી જાણે તપતી હતી
ત્યાં તરસ્યા મનની તૃષ્ણા બુઝાવવા
વરસાદ બનીને તમે મળ્યા

એકાંતના આ સાગરમાં નાવડી  જયારે મારી ડૂબી
ત્યાં જીવનસાથી રૂપે ખુશીઓ વરસાવવા
સાહિલ બનીને તમે મળ્યા

એકલતાભર્યું જીવન મારું હતું કેવળ શ્વેત કાગળ
ત્યાં સુખભર્યા સંસારનું ચિત્ર રચવા
રંગ બનીને તમે મળ્યા

સંબંધોમાં પ્રસરાઈ હતી કડવાશ જયારે સ્વાર્થની
ત્યાં નિસ્વાર્થ પણે સાથ નિભાવવા
મીઠાશ બનીને તમે મળ્યા

પોતાના છતાં પારકા એવા સંબંધો સાચવી થાક્યો જયારે
ત્યાં બે હૃદય વચ્ચેનું અંતર ટૂંકાવનાર
સેતુ બનીને તમે મળ્યા

જીવનનું આ કાવ્ય ગાતા જયારે હું વચ્ચે અટકી ગયો
ત્યાં 'ચિરાગ'ની આ અધૂરી ગઝલની આખરી
પંક્તિ બનીને તમે  મળ્યા